Undanfarin þrjú ár hefur ein vika á ári verið helguð nýsköpunarfyrirtækjum og frumkvöðlum í Evrópu undir yfirskriftinni SME Week eða evrópska fyrirtækjavikan. Í ár er vikan tileinkuð frumkvöðlastarfi kvenna þar sem áhersla er lögð á menntun, fjármögnun, fjárfestingar, tengslanetið og alþjóðavæðingu eða svo kölluð „born global“ fyrirtæki. Vilborg Einarsdóttir, frumkvöðull og einn af aðaleigendum fyrirtækisins Mentor er talsmaður vikunnar í ár fyrir Íslands hönd.

Af því tilefni verður haldin ráðstefna þann 18. október, undir yfirskriftinni „Frumkvöðlar eru framtíðin“. Efni ráðstefnunnar er sniðið að þörfum allra frumkvöðla og hagsmunaaðila í stuðningsumhverfi nýsköpunar og frumkvöðlastarfs á Íslandi. Á stokk stíga reynslumiklar konur sem búa yfir ólíkri og fjölbreyttri reynslu á því ferli sem frumkvöðlar þurfa að ganga í gegnum við stofnun og rekstur á eigin fyrirtæki. Á ráðstefnunni verður leitast við að svara spurningum í tengslum við alþjóðavæðingu fyrirtækja, fjárfestingarmat, nálganir og aðferðir við fjármögnun og mikilvægi tengslanetsins bæði í innlendu og erlendu samhengi svo fátt eitt sé nefnt. Á ráðstefnunni eru tveir og tveir frumkvöðlar úr ólíkum áttum leiddir saman og þeir fengnir til að fjalla um málefni sem er þeim sérstaklega hugleikið.

Ráðstefnan verður haldin í Salnum Kópavogi fimmtudaginn 18. október frá kl. 9:30 – 12:00. Allir áhugasamir eru velkomnir.

Dagskrá og skráningarform er að finna hér.

Nánari upplýsingar um ráðstefnuna er að finna hér.

Frekari upplýsingar veitir Kjartan Due Nielsen, verkefnisstjóri hjá Nýsköpunarmiðstöð Íslands og starfsmaður EEN, í síma: 522-9246 / netfang: kjartan@nmi.is.